ក្រោយការទះកំផ្លៀង Chris Rock លើឆាក Will Smith ត្រូវពិន័យមិនឱ្យចូលកម្មវិធី ១០ ឆ្នាំ

អ្នក​រៀបចំ​កម្មវិធី អូស្កា បាន​ធ្វើ​ការ​ពិន័យ​ទៅ​លើ​តារា​សម្ដែង Will Smith ដោយ​ហាម​មិន​ឱ្យ​ចូលរួម​កម្មវិធី​របស់ អូស្កា រយៈពេល ១០ ឆ្នាំ ក្រោយ​តារា​សម្ដែង​រូប​នេះ បាន​ប្រើ​ប្រាស់​ហិង្សា ទះ​កំផ្លៀង​ទៅ​លើ​តារា​កំប្លែង Chris Rock លើ​ឆាក​ប្រគល់​ពាន​រង្វាន់​អូស្កា កាល​ពី​ចុង​ខែ​មីនា កន្លង​ទៅ។

បើ​តាម​សារព័ត៌មាន NBC News ចេញ​ផ្សាយ​នៅ​ថ្ងៃ​ទី ០៨ ខែ​មេសា កន្លង​ទៅ​បាន​ឱ្យ​ដឹង​ថា អ្នក​រៀបចំ​កម្មវិធី អូស្កា បាន​ធ្វើ​ការ​ប្រជុំ និង បាន​ប្រកាស​ពី​ការ​ដាក់​ពិន័យ​ទៅ​លើ Will Smith។ ក្នុង​សារ​ប្រកាស​នោះ​បាន​រៀបរាប់​ថា ៖ «ថ្ងៃ​នេះ ប្រធាន​នៃ​អ្នក​ដឹកនាំ​ទាំង​អស់ បាន​មក​ជួប​ជុំ​គ្នា ធ្វើ​ការ​ពិភាក្សា​ទៅ​លើ​ដំណោះស្រាយ​ដ៏​ល្អ​បំផុត​ចំពោះ​ទង្វើ​របស់ Smith នៅ​ឯ​កម្មវិធី​ប្រគល់​ពាន​រង្វាន់​កាល​ពី​ពេល​ថ្មី​ៗ​កន្លង​ទៅ ហើយ​ក៏​សម្រេច​អនុម័ត​ថា នឹង​ដក​រូប​លោក​ចេញ​ពី​កម្មវិធី។ ពួក​យើង​បាន​សម្រេច​ចិត្ត​ថា តារា​សម្ដែង​រូប​នេះ នឹង​មិន​អាច​ចូលរួម​កម្មវិធី​របស់ អូស្កា (ទាំង​ចូលរួម​ដោយ​ផ្ទាល់ ឬ​តាម​អនឡាញ) រយៈពេល ១០ ឆ្នាំ គិត​ចាប់​ពី​ខែ​មេសា ឆ្នាំ ២០២២ នេះ​ទៅ»។

គួរ​ឱ្យ​ដឹង​ដែរ​ថា អាជីព​របស់ Will Smith នា​ពេល​នេះ គឺ​មាន​ការ​រង​ផល​ប៉ះពាល់​យ៉ាង​ខ្លាំង ក្រោយ​កម្មវិធី​ប្រគល់​ពាន​រង្វាន់​អូស្កា​មក ដោយ​អ្នក​ដឹកនាំ​រឿង​មួយ​ចំនួន ត្រូវ​បាន​ឱ្យ​ដឹង​ថា បាន​បញ្ឈប់​ការ​សហការ​ការងារ​ជាមួយ​លោក។ ជាមួយ​គ្នា​នោះ ថ្មីៗ​នេះ គម្រោង​ភាពយន្ត​ថ្មី​ចំនួន ២ គឺ​រឿង «Fast and Loose» និង «Bad Boys 4» ត្រូវ​បាន​ពន្យារ​ពេល​ថត បើ​ទោះ​បី​ជា​មូលហេតុ​ពិត​ប្រាកដ​មិន​ទាន់​បាន​បញ្ជាក់​នៅ​ឡើយ​នោះ ប៉ុន្តែ​គេ​ដាក់​ការ​សង្ស័យ​ទៅ​លើ​វត្តមាន​តារា​សម្ដែង Will Smith នេះ​ឯង៕

Related posts

Leave a Comment