ចាំប្អូនលក់លៀសហាលទេ? ពេលនេះ ឧកញ៉ា សួរ វីរៈ ឧបត្ថម្ភលុយ ២ លានរៀល និង រំពឹងបែបនេះចំពោះរូបគេ

នៅថ្ងៃទី ២៥ ខែមីនា ឆ្នាំ ២០២២ នេះ តាមរយៈផេកផ្លូវការរបស់លោកឧកញ៉ា សួរ វីរៈ បានបង្ហោះពីសកម្មភាពជួបជាមួយក្មេងប្រុសកម្សត់ លក់លៀសហាល ល្បីលើបណ្ដាញសង្គម ដែលលោកបានឧបត្ថម្ភថវិកាចំនួន ២ លានរៀល សង្ឃឹមថាអាចជួយក្មេងប្រុសបានមួយរយ:ពេលខ្លី ហើយក៏សង្ឃឹមថា ជីដូន ជីតា របស់គេនឹងអនុញ្ញាតឱ្យគេអាចចូលរៀនវិញ។

បន្ថែមលើសពីនេះ លោកឧកញ៉ាបានរំឭករឿងរ៉ាវផ្សាភ្ជាប់ និង ជីវិតក្មេងប្រុសខាងលើថា ៖ «ខ្ញុំគិតថា ជីវភាព និង ស្ថានភាពដូចក្មួយ គឺមានច្រើននាក់ណាស់ក្នុងប្រទេស។ អ្វីដែលបណ្តាលឱ្យខ្ញុំចង់ជួបគាត់ ដោយសាររូបភាព និង ដំណើរជីវិតដែលគាត់ជួបពេលនេះ វាហាក់ដូចជាដំណើរជីវិតពិតរបស់ខ្ញុំកាលនៅវ័យក្មេង ដែលរស់នៅពឹងលើខ្លួនឯង លក់ជ្រក់ លក់នំ លក់ពងទា លក់ការ៉េមកី ដើម្បីបន្តដំណើរជីវិតមកដល់ថ្ងៃនេះ»។

គួររំឭកផងដែរថា ទាក់ទិនទៅនឹងរឿងប្អូនប្រុសខាងលើ កាលពីថ្ងៃទី ២២ ​ខែមីនា ឆ្នាំ ២០២២ កន្លងទៅ មហាជននៅក្នុងបណ្ដាញសង្គមហ្វេសប៊ុក និង Tiktok បាននាំគ្នាផ្ទុះការចាប់អារម្មណ៍ សម្ដែងក្ដីរំជួលចិត្ត អាណិតក្មេងប្រុស ដែលបានអង្គុយដោយក្ដីអស់សង្ឃឹម ក្រោយភ្លៀងធ្លាក់ទទឹករទេះលៀសហាលអស់ គួរឱ្យអាណិតអាសូរបំផុត។

ដោយឡែក សកម្មភាពបែបនេះ ត្រូវបានមហាជនចែករំលែកបន្តព្រោងព្រាត ចេញពីគណនីឈ្មោះ Rax MP ក្នុងបណ្ដាញសង្គម Tiktok ដោយបានបង្ហាញពីសកម្មភាពរូបគេអង្គុយក្បែរទេះលៀសហាល នៅបណ្ដោយផ្លូវលេខ ៣៣​០ កែងវិថីសហភាពអឺរ៉ុប យ៉ាងអស់សង្ឃឹម ក្រោយមិនទាន់បានលក់លៀសអស់ផង បែរមកត្រូវទឹកភ្លៀងទទឹកអស់ គួរឱ្យសោកស្ដាយជំនួស៕

Related posts

Leave a Comment