សត្វឆ្កែដ៏កម្សត់ មិនដឹងម្ចាស់ស្លា-ប់ បែរជាទ្រាំដេកចាំម្ចាស់ ហាលភ្លៀង ហាលព្រិល រយៈពេល ៥ ឆ្នាំ

សត្វ​ឆ្កែ​មួយ​ក្បាល​ក្នុង​ប្រទេស​ចិន បាន​ទាក់ទាញ​ភ្នែក​មហាជន​ឱ្យ​ទប់​ទឹកភ្នែក​មិន​បាន​គ្រប់​គ្នា ក្រោយ​ឃើញ​សភាព​វា​ដេក​រង់ចាំ​វត្តមាន​ម្ចាស់​វិល​ត្រឡប់​មក​ជួបជុំ​នឹង​វា​វិញ។

បើ​និយាយ​ដល់​ក្រុង Shenyang ខេត្ត Liaoning ប្រទេស​ចិន គឺ​ប្រាកដ​ណាស់​នរណា​ៗ​ក៏​ធ្លាប់​បាន​ដឹង​ឮ​នៅ​រឿងរ៉ាវ​របស់​ឆ្កែ​កម្សត់​មួយ​ក្បាល​ឈ្មោះ Da Huang ដែល​បាន​ដេក​ទាំង​អំណត់​រង់ចាំ​ម្ចាស់​សំណព្វ​របស់​វា​អស់​រយៈពេល ៥ ឆ្នាំ។

កាល​ពី​ប្រមាណ ៨ ឆ្នាំ​មុន បុរស​វ័យ​ចំណាស់​ម្នាក់​ឈ្មោះ Lao Than បាន​យក​សត្វ​ឆ្កែ Da Huang ដែល​លោក​ឃើញ​នៅ​កន្លែង​ចាក់​សំរាម​យក​មក​ចិញ្ចឹម។ តាម​ការ​រៀបរាប់​បាន​ឱ្យ​ដឹង​ថា លោក Lao Than គឺ​ស្រឡាញ់ Da Huang ណាស់​ប្រៀប​ទុក​ដូច​ជា​សាច់ញាតិ​របស់​គាត់ ហើយ​តែងតែ​យក​តាម​ខ្លួន​ជាប់​ពេល​ទៅ​ណា​មក​ណា។

រយៈពេល ៣ ឆ្នាំ​ក្រោយ លោកតា​ចំណាស់​ជា​អកុសល​បាន​ទទួល​មរណភាព ដោយសារ​មាន​ជំងឺ​ធ្ងន់ធ្ងរ ប៉ុន្តែ​សត្វ​ឆ្កែ​ដ៏​គួរ​ឱ្យ​ស្រឡាញ់​របស់​គាត់ Da Huang មិន​បាន​ដឹង​ថា​ម្ចាស់​ឃ្លាត​ឆ្ងាយ​គ្មាន​ថ្ងៃ​ត្រឡប់​ឡើយ ដោយ​វា​នៅ​តែ​ដេក​កន្លែង​ធ្លាប់​ដេក​រាល់​ដង មិន​ចេញ​ទៅ​ណា រង់ចាំ​ការ​វិល​ត្រឡប់​របស់​ម្ចាស់​វា​វិញ។

រយៈកាល​អស់ ៥ ឆ្នាំ Da Huang ក៏​មាន​សភាព​ចាស់​ទ្រុឌទ្រោម ងើប​ទៅ​ណា​លែង​កើត ភ្នែក​វា​ក៏​មើល​អ្វី​ដែល​សូវ​ច្បាស់។ មនុស្ស​ជាច្រើន បាន​សុំ​យក​វា​ទៅ​ចិញ្ចឹម ប៉ុន្តែ​សត្វ​ឆ្កែ​ដ៏​ស្ម័គ្រស្មោះ​មួយ​នេះ គឺ​បាន​បដិសេធ​មិន​ព្រម​ទៅ​តាម​គេ​នោះ​ឡើយ។ ដោយ​ក្ដី​អាណិត​អាសូរ អ្នក​ភូមិ​នៅ​ទីនោះ ជា​ញឹកញាប់​តែងតែ​ផ្ដល់​អាហារ ទឹក និង​សម្លៀកបំពាក់​មួយ​ចំនួន​ទុក​ការពារ​វា​ពេល​រដូវ​រងា​មក​ដល់៕


Related posts

Leave a Comment